Fréttir
  • Tækni og vit logo

Örtækni verður á Tækni og vit í Fífunni 8.-11.mars

Styttist í sýninguna Tækni og vit 2007 í Fífunni: Yfir 100 sýnendur kynna það nýjasta í tækni og þekkingu

21.2.2007

Stórsýningin Tækni og vit 2007 verður haldin í Fífunni í Kópavogi dagana 8.-11. mars. Mikil gróska er í tækni- og þekkingariðnaði og verður sýningin stærsti viðburður sem haldinn hefur verið á Íslandi á þessu sviði.

Mikil fjölbreytni mun einkenna sýninguna en yfir 100 sýnendur taka þátt í henni. Sem dæmi má nefna fyrirtæki úr tölvugeiranum, bæði hugbúnaðar-, vélbúnaðar- og netfyrirtæki, auk fjarskiptafyrirtækja, orkufyrirtækja iðntæknifyrirtækja, sveitarfélaga, opinberra stofnana og ráðuneyta, skóla, fjármálafyrirtækja og fjölmiðla, svo eitthvað sé nefnt.  

Sýnendur munu kynna nýjungar í vörum og þjónustu en einnig veita margvíslega fræðslu um ýmislegt sem tengist tækni- og þekkingariðnaði. Sýningar á borð við Tækni og vit 2007 nýtast stjórnendum úr atvinnulífinu og hjá hinu opinbera jafnan vel til að mynda viðskiptatengsl og kynnast væntanlegum samstarfsaðilum.

Sýningin verður opin fagaðilum fimmtudag og föstudag en helgina 10. og 11. mars verður almenningur einnig boðinn velkominn. „Þó svo að sýningin sé hugsuð sem fagsýning tækni- og þekkingariðnaðarins er skemmtilegt að geta boðið almenningi að koma og kynna sér það sem sýnendur hafa fram að færa. Áhugi almennings á tækninýjungum er mikill enda hefur þessi þáttur sífellt meiri áhrif á okkar daglega líf og því munu án efa margir vilja kynna sér það sem fremstu fyrirtæki landsins í þessum geira hafa fram að færa,“ segir Margit Elva Einarsdóttir, framkvæmdastjóri sýningarinnar.  

Tækni og vit 2007 verður opin fyrir fagaðila fimmtudaginn 8. mars frá kl. 18:00-21:00 og föstudaginn 9. mars kl. 11:00-19:00. Helgina 10. og 11. mars er almenningur velkominn auk fagaðila og verður sýningin þá opin frá kl. 12:00-17:00 báða dagana.

Auk sýningarinnar í Fífunni verða ýmsir viðburðir haldnir í tengslum við Tækni og vit 2007. Þar má t.d. nefna ráðstefnu sem forsætis- og fjármálaráðuneyti halda í Salnum í tilefni UT-dagsins 8. mars og móttöku í Listasafni Kópavogs - Gerðarsafni 9. mars þar sem framsæknum sprotafyrirtækjum verða veittar viðurkenningar.  

AP sýningar standa að Tækni og vit 2007 í samstarfi við forsætisráðuneyti, fjármálaráðuneyti, iðnaðar- og viðskiptaráðuneyti, Samtök iðnaðarins, Háskólann í Reykjavík, Orkuveitu Reykjavíkur og TM Software.

Nánari upplýsingar um sýninguna má nálgast á vefnum www.taekniogvit.is.